ബഞ്ചമിന്‍ ഇടക്കര
പോയവര്‍ഷത്തിലെ സംഭവവികാസങ്ങളുടെ
വിട്ടുമാറാത്ത ഓര്‍മ്മകളെ തൊട്ടുരുമ്മി പുതുവര്‍ഷ പുലരി
ഉദിച്ചുയര്‍ന്നു കഴിഞ്ഞു. കളിച്ചു തീര്‍ന്ന പദപ്രശ്‌നത്തിന്റെ
(പസ്ല്‍) ഒടുവില്‍ ഇനിയും കളിക്കണൊ എന്ന ചോദ്യവുമായി രണ്ടായിരത്തി
പന്ത്രണ്ട് വന്നു നില്‍ക്കുന്നു. ജീവിച്ചിരിക്കുന്നവന്റെ മുമ്പില്‍
കളിയ്ക്കുവാനുള്ള തിരഞ്ഞെടുപ്പല്ലാതെ (ഓപ്ഷന്‍) മറ്റൊന്നില്ല
തന്നെ.
ഭീകരവാദത്തിന്റെ ചുക്കാന്‍ പിടിച്ച് ലോക രാഷ്ട്രങ്ങളുടെ ഉറക്കം കെടുത്തിയ ഉസാമ ബിന്‍ ലാദനെ നീണ്ട പത്തുവര്‍ഷത്തെ വേട്ടയാടലിനൊടുവില്‍ വകവരുത്തിയതിലൂടെ അമേരിയ്ക്ക ഉണ്ടാക്കിയ നേട്ടത്തിന്റെ കണക്ക് ക്ലോസു ചെയ്യാനാകാതെ ഭീകര പ്രവര്‍ത്തനം ഇപ്പോഴും ലോക രാഷ്ട്രങ്ങളുടെ ഉറക്കെ കെടുത്തുന്നു. ഈജിപ്റ്റിലും, ലിബിയയിലും മറ്റ് അറേബ്യന്‍ രാജ്യങ്ങളിലും അടിച്ചുയര്‍ത്തിയ ജനാധിപത്യത്തിന്റെ വിപ്ലവ കൊടുങ്കാറ്റ് ലോക സമാധാനത്തിനു നല്‍കാന്‍ പോകുന്ന സംഭാവനകള്‍ വലിയൊരു ചോദ്യചിഹ്നമായി നമ്മുടെ മുമ്പില്‍ നില്‍ക്കുകയാണ്.
ഭീകരവാദത്തിന്റെ ചുക്കാന്‍ പിടിച്ച് ലോക രാഷ്ട്രങ്ങളുടെ ഉറക്കം കെടുത്തിയ ഉസാമ ബിന്‍ ലാദനെ നീണ്ട പത്തുവര്‍ഷത്തെ വേട്ടയാടലിനൊടുവില്‍ വകവരുത്തിയതിലൂടെ അമേരിയ്ക്ക ഉണ്ടാക്കിയ നേട്ടത്തിന്റെ കണക്ക് ക്ലോസു ചെയ്യാനാകാതെ ഭീകര പ്രവര്‍ത്തനം ഇപ്പോഴും ലോക രാഷ്ട്രങ്ങളുടെ ഉറക്കെ കെടുത്തുന്നു. ഈജിപ്റ്റിലും, ലിബിയയിലും മറ്റ് അറേബ്യന്‍ രാജ്യങ്ങളിലും അടിച്ചുയര്‍ത്തിയ ജനാധിപത്യത്തിന്റെ വിപ്ലവ കൊടുങ്കാറ്റ് ലോക സമാധാനത്തിനു നല്‍കാന്‍ പോകുന്ന സംഭാവനകള്‍ വലിയൊരു ചോദ്യചിഹ്നമായി നമ്മുടെ മുമ്പില്‍ നില്‍ക്കുകയാണ്.
തെറ്റും ശരിയും കൂട്ടിക്കിഴിച്ച് ഉത്തരം കണ്ടെത്താന്‍ പ്രയാസമെങ്കിലും അമേരിയ്ക്കക്കാര്‍ക്ക് തെല്ലൊന്നാശ്വസിയ്ക്കാന്‍ വക നല്‍കുന്ന ഒന്നുണ്ട്. ഏകദേശം ഒമ്പതു വര്‍ഷം നീണ്ടു നിന്ന ഇറാക്ക് യുദ്ധം അവസാനിച്ചിരിയ്ക്കുന്നു. നികുതി ദായകരുടെ എണ്ണൂറു ബില്യന്‍ ഡോളര്‍ ചാമ്പലാക്കിയ ഈ യുദ്ധം അമേരിയ്ക്കയുടെയും സഖ്യകക്ഷികളുടെയും പ്രതിച്ഛായയ്ക്കുണ്ടാക്കിയ അപമാനം രാജ്യസ്‌നേഹികളായ പടയാളികള്‍ക്കും, അവരുടെ കുടുംബാംഗങ്ങള്‍ക്കും ഉണ്ടാക്കിവച്ച ഉണങ്ങാത്ത മുറിവുകളും, നിരപരാധികളായ ഇറാക്കിലെ ജനങ്ങള്‍ക്കുണ്ടായ ആള്‍ നാശത്തിനും ദുരിതങ്ങള്‍ക്കുമുള്ള പ്രായശ്ചിത്തമാകുമൊയെന്നത് ഉത്തരമില്ലാത്ത ചോദ്യം. ഇലക്ഷന്‍ വര്‍ഷത്തില്‍ ഒബാമയ്ക്ക് അവകാശപ്പെടാനൊരു നേട്ടം എന്നതിലുപരി ഈ യുദ്ധം അവസാനിച്ചതുകൊണ്ട് ആഗോള ഭീകരതാ ഭീഷണിയ്‌ക്കെന്തു നേട്ടമാണുണ്ടാക്കി? ലോകത്തിനു ഭീഷണിയായി വളര്‍ന്നു കൊണ്ടിരിക്കുന്ന ഇറാന് സഖ്യത നേടാന്‍ പോരുന്ന രീതിയില്‍ ഇറാക്കിന്റെ നിലമൊരുക്കിയെന്നതിനപ്പുറം ഇപ്പോഴത്തെ പിന്മാറ്റം കൊണ്ട് എന്തെങ്കിലും നേടിയൊ എന്ന് കാണാന്‍ അധികം കാത്തിരിയ്‌ക്കേണ്ടി വരില്ല.
പ്രകൃതിക്ഷോഭങ്ങളുടെ ലീലാവിലാസം കൊണ്ട് പൊറുതിമുട്ടി നില്‍ക്കുന്ന ജപ്പാന് മദ്ധ്യ പൗരസ്ത്യ ദേശങ്ങളുടെ രാഷ്ട്രീയ സ്ഥിരതയും അതിപ്രധാനമാണ്. 90% ക്രൂഡോയിലിനും ഈ രാജ്യം മദ്ധ്യ പൗരസ്ത്യ രാഷ്ട്രങ്ങളെ ആശ്രയിക്കുവെന്നതാണ് അതിനുള്ള കാരണം. പോയ വര്‍ഷങ്ങമുണ്ടായ സുനാമിക്കെടുതിയും അതിനെ തുടര്‍ന്ന് ഫുക്കുഷിമാ ന്യൂക്ലിയര്‍ പ്ലാന്റ് ഉണ്ടാക്കിയ ഭീഷണിയും പേടിസ്വപ്നമായി നമ്മുടെ മനസ്സില്‍ ഇപ്പോഴും ഞെട്ടലുളവാക്കുന്നില്ലെ? വാസ്തവത്തില്‍ ഇത്തരം പ്രതിസന്ധികളെ അഭിമുഖീകരിക്കാനുള്ള ജപ്പാന് ജനതയുടെ മന:ധൈര്യത്തെ അഭിനന്ദിച്ചെ പറ്റു. തീയില്‍ കുരുത്ത ഈ കൊച്ചു രാജ്യത്തിന് ലോക സമ്പത് വ്യവസ്ഥിതിയിലുള്ള സ്വാധീനം കുറച്ചൊന്നുമല്ലെന്ന് അറിയാത്തവര്‍ ചുരുങ്ങും. ആഗോള സമ്പദ് വ്യവസ്ഥിതി സാമ്പത്തിക മാന്ദ്യ ദുരിതം നേരിടുന്ന ഈ സമയത്ത് ലോക രാഷ്ട്രങ്ങളിലെവിടേയും ഉണ്ടാകുന്ന ചലനങ്ങളുടെ പ്രതിഫലനം ലോകത്തിലെല്ലായിടത്തും പ്രകമ്പനമുണ്ടാക്കുമെന്നത് അനുഭവിച്ചുകൊണ്ടിരിയ്ക്കുന്നവരാണല്ലൊ നമ്മള്‍. യൂറൊ മേഖലയിലെ സാമ്പത്തിക പ്രതിസന്ധിയ്ക്കു കാരണമായ ഗ്രീസിലും, ഇറ്റലിയിലും ഉണ്ടായ രാഷ്ട്രീയ കോളിളക്കങ്ങള്‍ കണ്ടറിഞ്ഞവരാണ് നമ്മള്‍. ഈ രാജ്യങ്ങള്‍ കട പ്രതിസന്ധിയെ അതിജീവിയ്ക്കാന്‍ ഈയിടെ എടുത്ത നടപടികള്‍ യൂറൊ നിക്ഷേപകര്‍ക്കിടയില്‍ തെല്ലൊരാശ്വാസം പകര്‍ന്നതിലാണ് യൂറോ മാര്‍ക്കറ്റില്‍ ഉയര്‍ച്ചയുണ്ടായതെന്ന് ഇടപാടുകാര്‍ പറയുന്നു. എന്നാല്‍ പുതുവര്‍ഷത്തിന്റെ ആരംഭ മാസങ്ങളില്‍ തന്നെ സര്‍ക്കാറിന്റെ കടക്കെണിയുടെ ചൂഷിതവലയം യൂറോപ്യന്‍ സമ്പത് വ്യവസ്ഥയെ പിന്നേയും തകര്‍ത്തു കളയുമെന്ന് യൂറോപ്യന്‍ കമ്മീഷന്‍ തന്നെ മുന്നറിവ് നല്‍കി കഴിഞ്ഞു.
പുതുവര്‍ഷത്തില്‍ സാമ്പത്തിക കെടുതിയില്‍ നിന്നും കരകയറാനുള്ള വെല്ലുവിളി അമേരിയ്ക്കയില്‍ ചാരം പൂണ്ടു കിടക്കുകയാണ്. കാര്യങ്ങള്‍ നേരാംവണ്ണം അറിയുന്നവര്‍ക്ക് എല്ലാം ശരിയായിക്കൊള്ളുമെന്ന ചിന്താഗതിയുമായി കഴിയുന്ന സമൂഹത്തെ ഭയത്തോടെ മാത്രമെ കാണാനാവൂ. ഉള്ളില്‍ ചീഞ്ഞു നാറി സംക്രമിക്കുന്ന വ്രണത്തെ പുറമെ പൊതിഞ്ഞുവെച്ച് സുഖപ്പെടുമെന്നു കരുതുന്നവരെപ്പോലെയാണ് ഇക്കൂട്ടര്‍. 160 മില്യണ്‍ വരുന്ന തൊഴിലാളി വര്‍ഗത്തെ എതിരേല്ക്കാനിരുന്ന നികുതി ഭാരത്തെ അടുത്ത രണ്ടുമാസത്തേക്ക് ഒബാമാ ഭരണത്തിന് തള്ളിനീക്കാനായതു തന്നെ അവസാന നിമിഷത്തിലാണ്. അതും വരാന്‍ പോകുന്ന പ്രസിഡന്റ് തെരഞ്ഞെടുപ്പില്‍ വോട്ടു ചെയ്യേണ്ടവരെ ഭയന്നുള്ളൊരു തീരുമാനം മാത്രം.
അമേരിയ്ക്കയ്ക്ക് ഇതു ഇലക്ഷന്‍ വര്‍ഷം. ഇപ്പോഴത്തെ സ്ഥിതി നോക്കിയാല്‍ ഒബാമയ്‌ക്കൊരു രണ്ടാമൂഴത്തിനുള്ള സാധ്യത നന്നെ കുറവാണ്. അതുകൊണ്ടു തന്നെ റിപ്പബ്ലിക്കന്‍ ഭാഗത്ത് പ്രസിഡന്റാവാന്‍ പൊരുതുന്നവരുടെ മത്സരത്തിനും പണ്ടെന്നത്തേക്കാളും വാശിയുണ്ട്. പൂര്‍വ്വ പിതാക്കന്മാരുടെ മാര്‍ഗ്ഗം പിന്തുടരുന്ന ഗ്രാന്റ് ഓള്‍ഡ് പാര്‍ട്ടി (ജി.ഒ.പി.) എന്ന ഓമനപ്പേരിട്ടു വിളിക്കുന്നവരാണ് റിപ്പബ്ലിക്കന്‍ പാര്‍ട്ടിക്കാര്‍. സാന്മാര്‍ഗ്ഗിക അധ:പതനത്തിനു വഴിതെളിച്ച അബോര്‍ഷനും, ക്ലോണിംഗിനും,
എംബ്രിയോണിക് സ്‌റ്റെം സെല്‍ ഗവേഷണത്തിനും, സ്വവര്‍ഗ്ഗ വിവാഹത്തിനുമൊക്കെ എതിരെ കടുത്ത നിലപാടു സ്വീകരിയ്ക്കുന്നവരായിരുന്നു റിപ്പബ്ലിയ്ക്കന്മാര്‍. കാലങ്ങള്‍ മാറിയപ്പോള്‍ പാര്‍ട്ടിയ്ക്കുള്ളില്‍ തന്നെ ഇത്തരം പ്രശ്‌നങ്ങളോട് അയവുള്ള ചിന്താഗതി വച്ചു പുലര്‍ത്തുന്നവര്‍ വര്‍ദ്ധിച്ചിരിക്കുന്നു. അധികാര മത്സരത്തിന് വോട്ടേഴ്‌സിനെ സ്വാധീനിക്കാന്‍ ഏതൊരു സ്ഥാനാര്‍ത്ഥിയും കളിക്കാറുള്ള അവസരവാദം ഇവിടേയും ഇല്ലെന്നില്ല. എന്നാല്‍ ഇത്തരം അവസരവാദവുമായി വിശ്വാസ സമൂഹത്തിന്റെ നേതൃ നിലയിലുള്ളവര്‍ വന്നാലുള്ള സ്ഥിതി ഈ രാജ്യത്തിന്റെ ധാര്‍മ്മിക അധ:പതനത്തെ മറ നീക്കി കാണിക്കുന്നു.
അമേരിയ്ക്കയുടെ ചരിത്രം സത്യ ദൈവാരാധനയില്‍ നിന്നു വേര്‍തിരിച്ചു നിര്‍ത്തി പഠിയ്ക്കാനാവില്ല. എന്നാല്‍ അമേരിയ്ക്കന്‍ ഡോളറില്‍ കാണുന്ന “ഇന്‍ ഗോഡ് വി ട്രസ്റ്റ്” നീക്കം ചെയ്യാനുള്ള അണിയറ നീക്കങ്ങള്‍ എന്നേ തുടങ്ങി കഴിഞ്ഞു. സുപ്രീം കോടതിയുടെ കെട്ടിടത്തില്‍ സ്ഥാപിച്ചിരുന്ന പത്തു കല്പനകളുടെ സ്മാരകം എടുത്തു മാറ്റാത്തതിന്റെ പേരില്‍ പുറത്താക്കിയ ചീഫ് ജസ്റ്റിസ് പൂര്‍വ്വപിതൃനിന്ദയുടെ രക്ത സാക്ഷിയാണെന്നു വേണം കരുതാന്‍. സ്വവര്‍ഗരതിക്കാരെ പട്ടാളത്തില്‍ ചേര്‍ക്കാനുള്ള അനുമതി നല്‍കുന്നതായിരുന്നു ഒബാമ ഭരണത്തിന്റെ നേട്ടങ്ങളിലൊന്ന്. സ്വവര്‍ഗ വിവാഹം നിയമ വിധേയമാക്കുന്ന സ്റ്റേറ്റുകളുടെ എണ്ണം ഇവിടെ വര്‍ദ്ധിച്ചു വരുന്നു. ഇതിനിടയില്‍ ക്രിസ്റ്റ്യന്‍ ബ്രോഡ്കാസ്റ്റ് നെറ്റുവര്‍ക്കിനനുവദിച്ച അഭിമുഖത്തില്‍ മോര്‍മോണ്‍ (കള്‍ട്ടു ഗ്രൂപ്പ്) വിശ്വാസിയായ മിറ്റ് റോമ്‌നി പ്രസിഡണ്ടു സ്ഥാനാര്‍ത്ഥിക്ക് യോഗ്യനെന്ന് പ്രസ്താവിച്ച് ബില്ലി ഗ്രഹാമിന്റെ മകന്‍ ഫ്രാങ്കിലിന്‍ ഗ്രഹാം വിശ്വാസ ലോകത്തെ അമ്പരപ്പിച്ചിരിയ്ക്കുന്നു. വിശ്വാസികളെ തിരുവെഴുത്തുകള്‍ക്കെതിരെ വോട്ടു ചെയ്യാന്‍ വഴിതെറ്റിക്കുന്ന ഫ്രാങ്കിളിന്‍ മാനസാന്തരപ്പെടണമെന്ന് യുഎസ്എ ക്രിസ്റ്റ്യന്‍ മിനിസ്ട്രീസിന്റെ പ്രസിഡന്റായ പാസ്റ്റര്‍ സ്റ്റീവന്‍ ആന്‍ഡ്രു ആവശ്യപ്പെട്ടു കഴിഞ്ഞു.
ആശയക്കുഴപ്പങ്ങളുടേയും, ആശങ്കയുടേയും മുമ്പോട്ടുള്ള നാളുകളെ കാണിച്ചുകൊണ്ട് ഈ പുതുവര്‍ഷം നമ്മെ എതിരേല്ക്കുകയാണ്. ഇതുവരെ എഴുതിയതില്‍ പ്രതീക്ഷയ്ക്കു വക നല്‍കുന്നതൊന്നും നമ്മള്‍ കണ്ടില്ല. ഉസാമയെ നശിപ്പിച്ചതു കൊണ്ടൊ, നോര്‍ത്ത് കൊറിയന്‍ പ്രസിഡന്റായ കിംഗ് ജോഗ് ഇല്‍ മരിച്ചതു കൊണ്ടോ ന്യൂക്ലിയര്‍ ഭീഷണിയൊ, ഭീകരവാദമൊ ലോകത്തില്‍ നിന്ന് നീക്കാനാവില്ല. ഏതെങ്കിലുമൊരു നേതാവിന് ലോകം നേരിടുന്ന സാമ്പത്തിക പ്രതിസന്ധിയില്‍ നിന്നും സമ്പദ് വ്യവസ്ഥയെ സ്ഥിരപ്പെടുത്താനാവില്ല. ഏതെങ്കിലുമൊരു ആത്മീയ നേതാവിനെ അനുകരിയ്ക്കാമെന്നു വച്ചാല്‍ അദ്ദേഹം നിങ്ങളെ വഴിതെറ്റിയ്ക്കാനിടയുണ്ട്. ഇവിടെ ഈ പുതുവത്സരത്തില്‍ നാം ഒരുപോലെ ആഗ്രഹിയ്ക്കുന്ന ഒന്നുണ്ട്, നമ്മെ നയിക്കാന്‍ കഴിവുള്ള ഒരു നേതാവിനെ യൂറോപ്യന്‍ യൂണിയനായാലും, അമേരിയ്ക്കയിലായാലും, ഇന്ത്യയിലായാലും ലോകത്തിന്റെ ഏതു രാജ്യമെടുത്താലും കാര്യക്ഷമതയുള്ള ഒരു നേതാവിനായി ജനങ്ങള്‍ ആഗ്രഹിച്ചു തുടങ്ങിയിരിക്കുന്നു. ഏക സമൂഹ വ്യവസ്ഥിതിയായി മാറിക്കഴിഞ്ഞ ലോകം ഇനി കാത്തിരിയ്ക്കുന്നത് ഒന്നു മാത്രം. തങ്ങളെ ഭരിയ്ക്കാന്‍ കഴിവുള്ള ഒരു നേതാവിനെ ലോകം ഉറ്റു നോക്കുന്നു. അതെ ബൈബിള്‍ പറഞ്ഞ എതിര്‍ക്രിസ്തുവെന്ന ആ നേതാവിന്റെ രംഗ പ്രവേശനത്തിനുള്ള പെരുമ്പറയടി അധികം ദൂരത്തല്ലാതെ മുഴങ്ങി കേള്‍ക്കുന്നുണ്ട്. നാടകം തുടങ്ങാന്‍ ഇനി കര്‍ട്ടന്‍ ഉയരുകയെ വേണ്ടു. അത് രണ്ടായിരത്തി പന്ത്രണ്ടില്‍ ആകട്ടെയെന്ന് നമുക്ക് പ്രാര്‍ത്ഥിയ്ക്കാം. എതിര്‍ക്രിസ്തുവിനോടൊപ്പം വാഴാനുള്ള കൊതികൊണ്ടല്ല, അതിനു മുമ്പേ മദ്ധ്യാകാശത്തില്‍ തന്റെ കാന്തയെ ചേര്‍ക്കാന്‍ ആത്മ മണവാളന്‍ വന്നിരിക്കുമെന്ന ഉറപ്പുകൊണ്ടാണത്. ആകയാല്‍ നിങ്ങളുടെ മനസ്സ് ഉറപ്പിച്ചു നിര്‍മ്മദരായി യേശുക്രിസ്തുവിന്റെ പ്രത്യക്ഷതയിങ്കല്‍ നിങ്ങള്‍ക്കു വരുവാനുള്ള കൃപയില്‍ പൂര്‍ണ്ണ പ്രത്യാശ വെച്ചുകൊള്‍വിന്‍. ആമ്മേന്‍ കര്‍ത്താവെ വേഗം വരേണമെയെന്ന പ്രാര്‍ത്ഥനയോടും തയ്യാറെടുപ്പോടും കൂടെ ഈ പുതുവത്സരത്തില്‍ കാലെടുത്തു വയ്ക്കാന്‍ സര്‍വ്വ ശക്തന്‍ നമുക്ക് ഏവര്‍ക്കും കൃപ നല്‍കട്ടെ.
No comments:
Post a Comment